有啲阿爸 成世人都唔識得點樣表達愛
有啲阿爸，成世人都唔識得點樣表達愛。 喺好多人嘅眼中，阿爸從來都唔係一個會將「我愛你」掛喺嘴邊嘅人。細個嗰陣覺得佢好惡，一開口就係喝你、鬧你，好似你做乜都錯；大個少少，又覺得佢好嘮嘈，日哦夜哦；或者相反，佢好靜，靜到你有時唔記得屋企仲有呢個人。總之，阿爸喺我哋心目中，好似就係一個唔識表達愛嘅人。
愛 其實可以有好多種面孔
阿爸嘅愛，可能係直接塞錢畀你，可能係話你唔好成日咁夜返，可能係成日催你：「搵到工未？」「拍拖未？」「幾時結婚？」。佢嘅愛，好多時都唔係直接嘅。每個人表達愛嘅方式都唔同，有人直接用把口講，有人選擇忍你啲脾氣，有人為咗想你開心而迫自己改變。都有人努力為你築起一個安樂窩，有人二話不說畀錢你。而阿爸揀嘅，往往係最沉默嗰種。所以好多時阿爸會做嘅，就係返工做到成個人散晒，只係為咗可以畀個安穩生活你；可能係佢半夜三更都唔瞓，想等你返嚟見你一面；可能係每次你返屋企，都總有一味你鍾意嘅餸。
阿爸表達愛嘅方式，好多時都係收埋喺行動入面。
佢哋都係咁大 冇人教過佢哋講愛
上一代嘅男人，好多都係咁樣長大。佢哋自己都未試過被溫柔咁對待，未聽過父母講「我愛你」，未試過被擁抱、被肯定。唔代表佢哋唔識愛，只係佢哋嘅「愛嘅語言」，由頭到尾都係責任、係承擔、係頂住。要佢哋將愛講出口，對佢哋嚟講實在太陌生。
呢樣嘢，其實可以追溯到原生家庭嘅影響。你爸爸嘅家人點樣對佢，就會影響佢點樣對你；而你爸爸點樣對你，又必然會影響你將來點樣對你嘅小朋友。原生家庭表達愛嘅方式，就係咁潛移默化咁改變你、塑造你對「愛」嘅定義。
如果你有個脾氣暴躁嘅老竇，你可能會潛意識覺得「發脾氣就係關心」；又或者，因為你太討厭嗰種模式，所以你極度避忌自己喺孩子面前發火，甚至驚到唔敢管教，選擇不聞不問。
如果你有個為頭家仆心仆命嘅爸爸，細個成日見佢凌晨躡手躡腳返屋企，打兩份工先勉強養得起頭家。咁你大個之後，可能會覺得愛就係沉默、係沉重、係付出到冇咗自己；又或者，你會好珍惜陪伴嘅時光，因為你知爸爸缺席自己童年嘅感覺有幾難受，所以你相信陪伴，勝過千言萬語。
總之，我哋其實好難完全擺脫到原生家庭對我哋嘅影響。
頻率唔同嘅愛
所以，當你覺得爸爸唔識得點樣表達愛，好少講感受、好少講心底話，甚至好少提起自己，其實好大機會，係佢根本唔知道，原來要用某種方式，你先會感受到愛。
而呢種情況，又點止發生喺父親同孩子之間？喺朋友、戀人、伴侶之間，我哋成日都誤會對方唔夠愛，或者以為對方已經變咗心。到頭來先發現，原來只係大家表達愛同接收愛嘅頻率唔啱。你用盡力氣去愛，但對方收唔到；對方掏心掏肺去付出，但你毫無感覺。嗰種點努力都溝通唔到嘅無力感，越積越厚，最後只好無奈放手。值得慶幸嘅係，喺家庭入面，你會有好多試錯嘅機會，有充裕嘅時間去慢慢學習、慢慢調整。
無聲的愛
人大個咗，身份唔同咗，開始組織自己嘅家庭，企喺父母嘅位置回望，你先至慢慢知道原來有啲愛，係好細聲，細到要過咗若干年月，先聽得清楚，先明白原來唔出聲，都可以係愛。
但願我哋都接收到爸爸嗰種愛嘅頻率。
#父愛 #父親 #愛 #香港爸爸 #原生家庭 #親子關係 #父子 #父女 #家庭