我和SEN眼中的世界 (撰文：兜帽男 – 阿信)

Hello 大家好我係阿信，一位來自童年時期有限公司嘅實習生，今日我就唔同大家講關於精神復康相關嘅資訊啦，今日我想同大家探討一下一個喺香港比較弱勢嘅社群SEN學生

閱讀指引：呢篇文章唔係一篇學術性文章，只係一個SEN後生仔諗到咩就寫咩嘅文章，如果覺得文法有問題嘅話，敬請見諒。

SEN係咩嚟㗎？

根據香港教育局嘅定義，SEN嘅全名係 Special Education Needs（特殊教育需要）。呢啲學生喺學習方面會因為有啲特殊嘅症狀而要花比正常人更多嘅時間去吸收知識。例如：因為專注力不足／過度活躍而無法專心上堂，又或者因為讀寫障礙而冇辦法流暢地閱讀文章或默寫字詞。以下係SEN嘅主要種類：

• 特殊學習障礙（SPLD）  
• 智力障礙（ID）
• 自閉症（ASD） 
• 專注力不足／過度活躍（AD/HD） 
• 肢體傷殘（PD） 
• 聽力障礙（HI） 
• 視覺障礙（VI） 
• 言語障礙（SLI） 
• 精神病（MI）

「既然其他人覺得我好多嘢講，咁我不如直接唔講嘢。」

睇過某套少女樂隊動畫嘅讀者應該明白我高中三年嘅感受——根本就係世界上嘅另一個我（笑）。

除咗學習方面，SEN學生最常遇到嘅困難就係人際關係。以作者本人為例，我有自閉症傾向同埋專注力不足。除咗喺同人傾偈時難以專心於一個話題之外，我亦都喺初中因為講嘢太大聲、太多嘢講而被同學疏遠（其實佢哋只係唔理我）。面對呢種情況，我諗：既然其他人覺得我太多嘢講，不如索性唔講，唔好嘈到人。結果我喺高中三年基本上冇同人講過嘢，朋友少之又少。好多時候，人會因為SEN嘅怪異行為而選擇遠離、排擠甚至貶低佢哋，令SEN學生更加自卑、情緒不穩。

『我』眼中嘅世界 我行路嘅時候會將專注力放喺啲奇怪嘅地方，例如：地下燈光跟住我隻腳移動嘅樣子、階磚之間嘅線、走廊上面嘅燈膽。離開屋企嘅時候，我會覺得冇安全感。特別係去一啲未去過嘅地方交收Trading Card Game卡牌時，我會好焦慮：賣家會唔會棄單？咩時候先到？點解時間到咗都未見人？為咗減輕焦慮，我習慣帶耳機聽音樂。對我嚟講，世界並冇唔同，只係當我獨自外出時，安全感會消失。（如果小朋友情緒唔穩定，家長可以試吓攬實佢哋，或者用啲被包住佢哋，令佢哋覺得安全。）

SEN都可以攞5**
雖然SEN學生喺生活上面有困難，但佢哋其實有好多優點。學習可能要比人付出更多努力，但一旦有明確目標或興趣，就可以在某方面發揮超常能力。作者高中認識一位朋友，英文差到全班墊底，但佢鍾意故事，最後喺DSE中史考到5**。所以，就算SEN喺某啲方面弱，都唔應該睇小佢哋。

同SEN相處有咩妙法？
作為同路人，我提供以下個人經驗俾家長、老師、朋友參考（僅供參考，未必適用於所有情況）。

• 朋輩／前輩：  如果你由細識到SEN朋友，咁你應該已經掌握到相處之道；如果冇，就要多啲耐性聽佢哋講嘢。SEN講嘢有時會太大聲或太細聲，可以適當提醒控制聲量。亦要畀多啲時間比佢哋表達自己，包容口齒不清或語法問題。

• 家人／老師：  你可能會發現佢哋難以從他人角度思考或融入群體。要改善呢種情況，重點係開拓視野。呢個唔只係要SEN小朋友參加活動去學習待人接物，家長老師都應該增值自己，了解小朋友嘅處境。當你明白佢哋嘅困難，就自然更容易包容佢哋。

總結：多謝我屋企人喺我呢20年冇放棄我。亦多謝各位睇我呢篇真情文章，希望大家睇完之後能更了解SEN學生，並喺面對佢哋時俾多啲包容同笑容。

參考資料：

• 香港教育大學-特殊教育需要支援服務 2024年 11月 25日：https://www.eduhk.hk/sao/zh-hant/info/sen/about_sen
• SEN類型 特殊教育需要類別- Snaildy 2025年：https://www.snaildy.com/sen