小丘小休｜遇到突發事件會Hang機？現代嘅洪水猛獸確是可怕 (撰文：Heal姑)
「我轉數慢，應付唔到工作上既突發事件，一有新狀況就成個人hang機。」- 果汁冰冰🍹投稿
Dear 果汁冰冰🍹,
雖然唔知你呢個評價係從何而來嘅，但係點都好，好想俾個大大嘅擁抱你先 ! 睇到你咁樣評價自己，我感覺到嗰份無力同自責…🥺
喺呢個時候，Heal姑想分享一個心理學裡面有關焦慮感嘅理論，就係我哋遇到巨大危機嘅時候，可能會有3個反應：一係逃走 (flight)、二係戰鬥 (flight)、三係當遇到巨大危機而無法處理，就會hang機 (freeze)。佢哋係我哋與生俱來嘅生存意識，就好似古人遇到猛獸嘅反應一樣。
所以，你話你遇到突發狀況出現嘅時候成個人hang機，係完全正常嘅生存反應！喺現代，工作上嘅突發狀況，對我哋嚟講就好似洪水猛獸一樣大嘅威脅🐅（講樣秘密你聽啊，Heal姑當年做學生護士嘅時候，連量個血壓咁簡單都試過hang機😆）
如果想自己減少hang機嘅情況，首先可以做嘅就係盡做可以做嘅心理準備。假設你要教書，知道有位有行為問題嘅同學會喺班入面，就可以提前演練。你可以問下自己，假如佢當刻出現行為偏差, 令課堂秩序受影響, 我可以搵邊位同事帶佢出課室冷靜呢?
當然都有可能出現意料之外嘅事，記緊我哋有freeze嘅反應係正常嘅，但有個方法可以立即將我哋嘅焦慮感快速降溫：就係五感著地練習 (靜觀練習)：
當你嗰刻感覺到自己有極大嘅焦慮感出現嘅時候，可以立即用五個感官(視覺、聽覺、嗅覺、觸覺及味覺)去感受吓周邊嘅環境，例如：你可以帶定粒糖喺身，喺嗰吓立即含一粒糖，喺心入面形容下佢個味道🍬
咁樣會有助你快速回到當下，降溫當中嘅情緒，令你能回歸本來嘅狀態，有助你解難啊❣️
無論做咩工作都好，我地都係人，都會有焦慮感升溫嘅時刻，但記緊呢個情緒背後其實係因為你對事情嘅著緊，所以係冇錯嘅！而且當工作經驗慢慢累積，喺不久嘅將來, 你一定會越來越得心應手❤️
Trust the Process, and Trust Yourself❣️
Love,
Heal姑❤️🩹
【作者簡介】
Heal姑為一位註冊精神科護士 (RN, Psy)，同時擁有兒童及青少年專科護士資格以及香港大學醫學院碩士學位。多年來，她一直在醫管局、社區和各大中小學中服務，願景希望每個孩子都能擁有快樂和充滿希望的童年，充分發揮他們獨特且無限的潛能
Follow Heal姑 Instagram (@healhealday_psynurse): https://www.instagram.com/healhealday_psynurse
留意我們的Instagram，參與下次投稿活動：https://www.instagram.com/gongsumsi