小丘小休｜即將面臨畢業? 迷茫中的一點光 (撰文：Heal姑)

「我即將面臨畢業，但對未來感到迷茫。不知道自己是否該選擇繼續升學，還是直接進入職場。家人希望讀master，但我並沒有太大的興趣，不敢表達自己想法，害怕讓家人失望。」- haha投稿 

Dear haha,

面臨畢業，真係人生其中一個最迷茫嘅時刻。特別係依家嘅經濟同社會狀況，都真係好唔容易，所以感到不安，係人之常情，亦代表你好認真咁對待自己嘅未來。

害怕令家人失望，好多時都係因為愛
我相信你好錫屋企人，亦好希望佢哋開心、為你驕傲。不過你知嗎？好多時候，屋企人其實調返轉都係好想你過得穩定同快樂；當然，有啲時候，佢哋都會把自己未完成嘅期望放喺孩子身上，無形中令你覺得有壓力。

細細個嘅時候，我哋總想滿足父母，因為佢哋就係我哋嘅天空；但而家嘅你，已經係一位大學準畢業生，你嘅世界唔再只得父母，仲有你喺呢個世代得嚟嘅見識同眼界。你，正慢慢成為一個獨立嘅大人，會喺人生路上闖盪，為每一個成功或失敗歡呼，亦學習承擔。

我知道，驚係真嘅——就算係已經grad咗咁多年嘅Heal姑，都仲係會驚。不過，邊走邊學、邊走邊感嘆，能夠「自己揀」已經係一種力量同禮物。當你慢慢見證自己每一步嘅成長，你會發現，無論係好定唔好嘅選擇，最後都會成為你故事入面有意義的一部分。

不妨畀自己啲時間，去識下唔同人，聽下唔同故事
如果你暫時未搵到喺職場嘅發光點，不妨畀自己啲時間，去識下唔同人，聽下唔同故事，參加下唔同活動，讓自己接觸多啲世界。呢個世界，總會有樣嘢，係讓你就算辛苦，都仲想做落去。另外, 亦有人會以「先儲錢」為目標去工作，然後喺工作以外嘅時間實現自己想做嘅事，呢個都可以係一種生活模式。

至於Master，佢可以係知識上嘅增長，亦可以係轉行嘅籌碼，但真係唔需要太急。你可以先擴大體驗，再慢慢選擇；當你同家人對話嘅時候，不妨先多謝佢哋嘅關心同期待，然後好誠實咁分享你而家嘅迷惘同計劃、時間表同備用方案，等佢哋更加放心。好多時，當佢哋見到你有想法、有準備，心都會安定好多，繼而給予更多空間。

人生仲有好多可能性。Heal姑會陪住你一齊行，一齊試，見證你在迷惘入面慢慢長出屬於自己嘅方向。希望你搵到合適你嘅生活模式💛

Love,
Heal姑❤️‍🩹

【作者簡介】
Heal姑為一位註冊精神科護士 (RN, Psy)，同時擁有兒童及青少年專科護士資格以及香港大學醫學院碩士學位。多年來，她一直在醫管局、社區和各大中小學中服務，願景希望每個孩子都能擁有快樂和充滿希望的童年，充分發揮他們獨特且無限的潛能

Follow Heal姑 Instagram (@healhealday_psynurse): https://www.instagram.com/healhealday_psynurse

留意我們的Instagram，參與下次投稿活動：https://www.instagram.com/gongsumsi